Saka-kanaog

Dili na bag-o sa akoa ang mokatkat ug modulhog sa kabukiran tungod kay kada-adlaw kong magbaklay gikan sa among balay nga nahimutang sa bukirang bahin sa Sugbo paingon sa UP. Nahimo na kining ordinaryong buluhaton. Apan niadtong nakagahin kog higayon nga mokatkat og mas taas nga bukid, nakaingon ko nga ang pagsaka-kanaog sa kabukiran dili ra kutob sa pag-uli ug pagbiya paingon sa eskwelahan, kon dili, usa kini ka panaw nga makamugnang handumanan.

Niadtong Disyembre, human sa Pasko, wa na gyod ko kapugong sa akong kaugalingon nga mosaka og mas taas nga bukid isip pagtapos sa hangak kaayo nga semester. Ug labaw sa tanan, tungod pod diay sa kadaghang pagkaon nga akong gihabhab sa bakasyon.

Source: http://givemeareasonto-love.tumblr.com/post/68010223945

Ug kay lagi mas lingaw man kon adunay katabi sa dalan, nanintal ko og duha ka kauban. Naghinamhiman na ang duha. Ang usa, tungod kay ganahan kuno siyang malimot sa kaamaw sa iyang bana nga matod pa niya, adunay laing kaduwa. Samtang ang usa, ganahan lang gyod kuno siyang panington.

Sayo sa buntag, alas kwatro, ang sabot nga mangmata maong bisag naglisod pa og tikang sa mga tiil ug alsa sa lawas nga nabug-atan sa katapolan, hala sige bangon. Bisag lami pa kaayong magbukot sa bagang habol nga makawala sa katugnaw, hala sige bangon..

Ug kay lagi ako man maoy nanintal, ako ilang gipagiya kon asa mi padung. Limod sa ilang kasayoran nga utro pod ko nga wala kahibaw kon unsa among maabtan, kon unsay nagpaabot namo sa tumoy sa tungason nga dalan.. Basta kay naa pa mi gisubay nga dalan, segurado ko nga makauli pa mi sa among gigikanan.

Mga baynte minutos pa lang sa among pagsaka, gihangak na ang usa namo ka kauban. Gipaningot og maayo bisan pa sa katugnaw sa alas kwatro sa kaadlawon. Samot na gyod nga gipaningot sa dihang niusig ang usa ka batalyong iro nga nag-atang sa dalan nga among giagian. Maayo na lang gani kay nakatakin mi daan og mga latos aron ihadlok sa mga iro. Girl Scouts god ni!

Padayon namong gibaktas ang bakilid nga kalsada. Adunay kongkreto ug batoon nga dalan nga mora ba og wala na maabti sa mga politikong nagpaharuhay sa ubos. Ug sa among paglantaw-lantaw sa kadalanan, aduna mi nakaplagan nga mga basurang biniyaan pod sa mga milabayng bisita. Mora ba hinuon og nahimong labayanan ang kabukiran sa mga kagaw sa taga-
ubos nga nisaka lang aron magkuhag mga hulagway nga ikapanghambog. Nalantaw pod namo syudad diin ang mga buildings mora na lang og buak nga mga bildo nga gihabolan og abog.

Wala mi nihunong sa pagsaka-kanaog hangtod nga nakaabot gyod mi sa bukid kon diin nalantaw namo ang mas daghan pang gagmayng bukid sa ubos. Dili kabayran og sapi ang among nalantaw nga kaanyag sa pagsaka sa adlaw nga mora og nisumpay sa panganod ug dagat, pakapinan pa og hangin nga makapanlimbawot sa balhibo. Paminaw god namo, pipila na kang ka tikang maabot na namo ang langit.

Dili gyod tinuod lalim mokatkat sa kabukiran apan sa among pag-abot didto, nakapanghupaw ug nakaingon gyod ko, “Finally, naa na koy positibong kahulogan sa “katkat problems”.

***
Sinuwat ni Jae Mari Magdadaro.